"ءتىلدارىن – 2019" رەسپۋبليكالىق بايقاۋىنىڭ وبلىستىق كەزەڭىندە ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ 3-كۋرس ستۋدەنتى تيمۋر مۇحامەتقالييەۆ جەڭىسكە جەتتى. قازىلار القاسى قاتىسۋشىلاردىڭ ءبىلىمىن ءۇش كەزەڭ ارقىلى باعالادى. بايقاۋعا 18-22 ارالىعىنداعى جاستار قاتىستى. بايقاۋ قورىتىندىسى بويىنشا، قاتىسۋشىلار ديپلومدارمەن، العىس حاتتارمەن جانە اقشالاي سەرتيفيكاتتارمەن ماراپاتتالدى.

– بايقاۋ ءتىل ساياساتىن، اتاپ ايتقاندا – ۇشتىلدىلىكتى دامىتۋعا باعىتتالعان. باستى ماقسات – قابىلەتتى جاستاردى انىقتاۋ جانە قولداۋ، مادەنيەتتى قالىپتاستىرۋ، كوپتىلدىلىكتى ۇيرەتۋ، ءپاتريوتيزمدى نىعايتۋ، باسقا حالىقتاردىڭ مادەنيەتى مەن ءتىلىن قۇرمەتتەۋگە شاقىرۋ. بايقاۋدىڭ جەڭىمپازى رەسپۋبليكالىق وليمپيادادا وبلىسىمىزدىڭ نامىسىن قورعايتىن بولادى. ايتا كەتۋ كەرەك، رەسپۋبليكالىق كەزەڭ بيىلعى جىلدىڭ قازان ايىندا شىمكەنت قالاسىندا وتەدى، – دەيدى اتىراۋ وبلىستىق تىلدەردى دامىتۋ باسقارماسىنىڭ باسشىسى ءاسيا قىستاۋبايەۆا.